Z Bórkow/Burg. Stwórtk, 23. apryla, jo Domowniska śpa Bórkowy kśěła zarědowaś wótwórjenje noweje wustajeńce „Mójo nejrědnjejše rucne źěło“. To wótwórjenje bóžko musy wupadnuś, ale nanejmjenjej ta Domowniska śpa móžo wót togo dnja za woglědarjow zasej wótcynjona byś.

Wót pětka, 24. apryla, budu tam nowu wustajeńcu pokazaś. Bärbel Šubertowa wót Domowniskeje śpy jo wužywała te tyźenje mimo woglědarjow, aby tych wušej 80 eksponatow kradosćiwje a rědnje aranžěrowała. Te wšake wustajone twóŕby – mjazy drugim wušywane, wukokulkowane, wukleplowane abo wupleśone – póchadaju wót 49 žeńskich a muskich cełego regiona wokoło Bórkow až do Carneje Plumpy, wót Gubina do Łukowa, z Barlinja, Halle nad Solawu a samo z Českeje. Eksponaty su swójske źěła priwatnych wósobow abo źěła jich prědownikow, kótarež su na najśpach a w spižkach drěmali. Wustajeńca teke pokažo na te cesto zapśimujuce familijowe stawizny abo zajmne stawizny nastaśa, ako z tym abo drugim kusom zwisuju.

Domowniska śpa jo wótwŕojona wót srjody do njeźele, pśecej wót zeger 12:00 do zeger 16:00.