Chóśebuz/Cottbus

Oratorium Nalěćo

Chor a orchester Serbskego ludowego ansambla kaž teke chory Meja, Lipa, Budyšin a Łužyca – wušej 100 sobustatkujucych – pśedstajiju pód nawjedowanim dirigentki Katharina Dickopf oratorium „Nalěćo“ Korle Awgusta Kocora & Handrija Zejlerja w chóśebuskem Statnem źiwadle. Kórtki za oratorium, njeźelu, 26. apryla, zeger 17:00, maju w Serbskej kulturnej informaciji LODKA kaž teke pśi Statnem źiwadle pód linkom https://staatstheater-cottbus.eventim-inhouse.de/webshop/webticket/seatmap?eventId=9802 na pśedań.

Cytanje k dopomnjenju na nuklearnu katastrofu

Literarny salon „Sowohl als auch“ pšosy njeźelu, 26. apryla, na nimsko-ukrainske cytanje do „Eck 51“. We srjejźi stoj 40. wrośenica wjelikeje katastrofy w nuklearnej milinaŕni w Čornobyłu (Tschernobyl). Cytaś buźotej chóśebuskej Thomas Bruhn a Nataliia Hrajvoronska, kótaraž jo w młodych lětach moderěrowała w ukrainskej telewiziji. Teksty budu wzete z knigłow „Störfall“ DDR-awtorki Christa Wolf, wušej togo ukrainske pśinoski w ukrainskej a nimskej rěcy.

Zachopk jo zeger 17:00, do teje rumnosći móžośo wót zeger 16:30. Pó cytanju buźo rozgrono k wužywanjeju nuklearneje energije. Gósći su mjazy drugimi Johannes Drews (dwě lěśe był we pśedsedaŕstwje teje ICAN Nimska – International Campaign to abolish nuclear wapons), fyzikaŕ dr. Hartmut Leipner a chóśebuski politikaŕ Felix Kotzur (Kócur) wót Zelenych.

Powěsćowe figury gjarncarjowaś

Wuknikojska firma Nykus pšosy pónjeźele, 27. apryla, zeger 15:30, na kurs gjarncarjowanja. Z běłeje gliny móžośo wósebnu powěsćowu figuru zgótowaś. Pśizjawjenja pód: 0162 58158 73 abo z mejlku na .

Folkowa muzika wuwija se dalej

... To jo zwěsćił Rejowański dom Łužyca. Dajo mjaztym wšake kupki, ako zwězuju tradicionelny sound z elektroniskimi beatami. Gregor Kliem wót Rejowańskego doma Łužyca měni: „Na take beaty móžoš teke super rejowaś w kole!“ A to móžośo teke sami proběrowaś, gaž buźośo pónjeźele, 27. apryla, zeger 19:00 pódla pśi rejach w chóśebuskem „mittendrin“. Pśiducy tyźeń, 4. maja, źo to dalej w Rejowańskem domje Łužyca z live-wustupom kupki „Serbska reja“, a to pód motom „Dajśo se pśechwataś!“. 11. a teke 18. Was docakajo „normalna reja“.

Dešno/Dissen

Župne pśedsedaŕstwo Domo-

winskeje župy Dolna Łužyca

... se zmakajo wałtoru, 28. apryla, zeger 17:00 w Dešnje, na Dwórje Sprjewinego ługa (Depšćańska droga 1). Na dnjownem pórěźe stoj mjazy drugim:

pśedstajenje wobydlaŕskego towaristwa Žylow

aktualny staw w źěłowej kupce „koncepcija za image-kampanju za dolnoserbšćinu“.

„Stary lud“ startujo do sezony

Na kóńcu tyźenja 2. a 3. maja se pśeměnijo teren za Domowniskim muzejom do žywego słowjańskego sedlišća ze srjejźowěka. Pód motom „Casowe drogowanje do słowjańskego srjejźowěka“ pokažu historiske pśedstajarje (w rolach Słowjanow, Wikingarjow a Frankow) wót zeger 11:00 do 17:00 wšedne žywjenje pśed 1.000 lětami: wjelerake rucnikaŕstwo a wójowanje.

Wjerbno/Werben

Pisany tšanterowy mark

Sobotu, 25. apryla, wót zeger 10:00, pśepšosyjo Tradiciske towaristwo Wjerbno na pisane tšanterowy mark do kněskego parka Seydlitz z wjelebocnym póbitowanim kaž z woblekanim za źiśi a dorosćonych, źiśecymi graśami, knigłami a drugim.

Baršć/Forst

Wótwóriju wustajeńcu „Nosona wjelerakosć/Getragene Vielfalt“

Drogujuca wustajeńca „Getragene Vielfalt – Sorbische Trachten der Lausitz“, ak pokažo dolnołužyske a górnołužyske drastwine tradicije, zaśěgnjo do foyera wokrejsnego zastojnstwa wokrejsa Sprjewja-Nysa. Wóna se wótwórijo wałtoru, 28. apryla, zeger 17:30 z krajnem raźcom Harald Altekrüger a Zwězkom za serbski kulturny turizm z.t., kenž jo zestajił toś tu fotowu wustajeńcu. Teke te na motiwach fotowego ateljeja Goethe zapópadnjone drastwine modele budu pśi wernisažy pódla. Woglědaś móžośo se tu wustajeńcu we wokrejsnem domje až do 26. junija 2026.

Lipsk/Leipzig

Twóŕbowa pśeglědka

Bernharda Schippera

Lipšćański wuměłski hotspot pokažo prědny raz wobšyrnu pśeglědku twóŕbow wuměłca Bernharda Schippera (*1970 w Budyšynje), ze tśich lětźasetkow jogo stwórjenja wót koncepcionelnych medijowych źěłow z 1990ych lět do źinsajšneje role ako sobu-iniciator a zastupnik „Nowego serbskego wuměłstwa“. Wustajeńca, kótaraž zajźonosć nowo rozjadnajo, wótwórijo se stwórtk, 30. apryla, zeger 19:00 w galeriji KK5 (Kěta-Kollwitzowa-droga 5) a buźo wiźeś až do 12. junija.

Budyšyn/Bautzen

Źěłaŕnicka za běły głos

Wót 29. do 31. maja ze zachopjeńkom pśecej zeger 16:30 nawjedujo Walburga Wałdźić spiwny kurs, w kótaremž wucy wósebnu słowjańsku wašnju spiwanja, ga z tak pomjenjonym „běłym głosom“. Kurs za žeńske buźo w Budyšynje, w Serbskem ludowem ansamblu. Dwa głosa z Pólskeje buźotej Walburgu Wałdźić pśi wuwucenju pódpěrowaś. Za kurs dejśo se zacasa pśizjawiś (z mejlku na ), pśeto městna su wobgranicowane.