ŹO, GA, CO? ZAPISK TERMINOW
Nižej nalicone terminy stoje teke w śišćanej wersiji Nowego Casnika wótśišćane.
Jolic měniśo, až znajośo wažny abo zajmny termin, kótaryž serbsku zjawnosć zajmujo,
a cośo jen našym cytarjam k wěsći daś, ga pósćelśo jen nam z e-mailom abo faksom
(glej menij „Redakcija“).
Terminy (24.09.26)
Chóśebuz/Cottbus
Pśednosk lawreatki myta
„Bogumiła Šwjele“
W Serbskem domje buźo wałtoru, 29. septembra, wót zeger 15:00 zarědowanje Maśice Serbskeje: Lawreatka myta „Bogumiła Šwjele“ MS, Stella Kliemojc, mjaztym absolwentka DSG, pśednosujo k temje: „Góspodaŕstwo słowjańskich sedlišćow mjazy Łobjom a Odru wót 6. do 12. stolěśa.“ Zajmce su wutšobnje pśepšosone.
Rubyn/Ruben
Film „Móc drastwow“
Do rubyńskeje „Stareje šule“ pśe-pšosuju srjodu, 30. septembra, zeger 18:00, na pśedstajenje filma „Móc drastwy/Die Macht der Tracht“ z magacina Łužyca a na rozgrono.
Bórkowy/Burg
Wuměłstwowe a kreatiwne wiki
W Muzeju oldtimerow „Kolbenfresser“ na Krabatowej droze w Bórkowach sćo sobotu, 26. septembra, a njeźelu, 27. septembra, pśecej wót zeger 10:00 do 18:00 pšosone na wuměłstwowe a kreatiwne błośańske wiki, źož móžo se młogi z ruku źěłany pókład namakaś, mjazy drugim teke drastwine źěle. Mimo togo se póbituju regionalne produkty a basleńske workshopy a socialne projekty se pśedstajiju.
Z woglědom tych wikow (zastup płaśi za dorosćonych 3 euro, jo za źiśi do 12 lět dermotny) pódpěrujośo źiśecy dom „Pusteblume“, SOS źiśecu wjas a „Pakt für Pflege“.
Lědy/Lehde
Swěźeń na Lědach
Pśi swěźenju na Lědach, ga sobotu, 26. septembra, a njeźelu, 27. septembra, wótwóriju wobydlarje swóje dwóry za woglědari, pśed-stajiju regionalne speciality a pśepšosyju k zeznaśu tradicijow.
Běła Góra/Byhleguhre
Gabriele Warchold cyta
Pód motom „Fliegenfänger, Großmutter und das rollende R“ pśedstajijo awtorka Gabriele Warchold srjodu, 30. septembra, zeger 19:00 w „Starem konsumje“ dožywjenja ze swójogo źiśetstwa, ako jo lěśojske prozniny w górnołužyskej jsy pśebyła. Buźo to retrospektiwa do 50-tych lět. Za muzikaliske wobrubjenje togo zarědowanja w rěźe „Kultura na jsy“ buźo se staraś pśedsedaŕka towaristwa „Eck 51 e.V.“ w Chóśebuzu Jana Weichert. Zastup płaśi 5 euro.
Pódstupim/Potsdam
„Nacasne Serbske Wuměłstwo“
Wuměłcowki a wuměłce wót NSK Lipsk (Ulrike Lux, Carsten Busse, Bernhard Schipper) a wót Kolektiwa Wakuuma (Arne, Luka Lětko, Karolina Krawcec, Hella Stoleccyc, Tamko, Zelko) prezentěruju swójo „Nacasne Serbske Wuměłstwo / Načasne Serbske Wuměłstwo / Zeitgenössische Sorbische Kunst“ we Wuměłskem domje Pódstupim. Sćo wutšobnje pśepšosone na wernisažu njeźelu, 27. septembra, zeger 16:00. Finisaža buźo njeźelu, 8. nowembra, zeger 16:00.
We tom casu móžośo se wustajeńcu woglědaś wót srjody do njeźele, pśecej wót zeger 12:00 do 17:00.
SERBSKI INSTITUT PYTA
SERBSKI INSTITUT PYTA
tak malsnje ako móžno
angažěrowanu bibliotekaŕku/
angažěrowanego bibliotekarja
za Serbsku centralnu biblioteku w Budyšynje.
Jadna se wó nejpjerwjej na dwě lěśe wobgranicowane źěłowe městno
z wobměru až do 28 góźinow. Wjaselimy se na Wašo procowanje
až do 16.10.2026.
Dalšne informacije namakajośo pód:
www.serbski-institut.de
Wobstawne blido
Z Bórkow/Burg. Wše zajmce su pšosone na pśiduce wobstawne blido „Mina Witkojc“. Zarědowanje buźo sobotu, 3. oktobra, zeger 15:00 pśi Błośańskem dwórnišću w Bórkowach (Am Bahnhof 1). Tam se wótmějo pó iniciatiwje bórkojskego amta a Błośańskeje domowniskeje śpy performatiwny špacěr wót zeger 15:00 do 16:00 z rejowańskim projektom „Mina Witkojc“.
