Chóśebuz/Cottbus

Spoken-word-show: „Ostwestpoetry“

Sedym poetkow a poetow z rewěrow Łužya, Póruhrska a Rudne Góry se w formaśe „spoken word“ rozestajijo z temu pódzajtšo/pódwjacor a strukturnu změnu. Sćo wutšobnje pšosone, to dožywiś pětk, 23. oktobra, zeger 19:00 w Starej płachtaŕni w Chóśebuzu.

Šwedske reje

Pónjeźele, 26. oktobra, zeger 19:00, buźo pśi Rejowańskem domje Łužyca w „mittendrin“ slědujucy fokus: „Polska a druge šwedske reje a co maju z Łužycu cyniś“. Sćo wutšobnje pśepšosone.

Wótwórjenje wustajeńce

Lodka wutšobnje pśepšosyjo na wótwórjenje noweje wustajeńce „Unsere Spurensuche – pytamy za slědami“, a to stwórtk, 29. oktobra, zeger 18:00, w klubowni Serbskego doma. We njej se wudajotej łužyskej wuměłcowce Lena Kolbow a Michelle Kalz do swěta serbskich powěsćow. Lena Kolbow, 24 lět stara, jo pśi wukubłanju ako wótkubłaŕka na OSZ serbsku rěc wuknuła. To jo ju inspirěrowało, se ze serbskeju kulturu a swětom bajkow a powěsćow wuměłski rozestajaś. Michelle Kalz, 28 lět stara, jo ilustratorka a comicowa wuměłcowka. Ze swójimi digitalnymi wobrazami rozestaja se tejerownosći z temu powěsći, tradicije a nałogi Serbow. Wót lěta 2023 wózjawijo swóje za wětšy źěl žortne comici pód mjenim „Zweite Reihe Mitte“. Wustajeńca jo wót 30. oktobra 2026 do 22. januara 2027 wšednje pónjeźele do pětka wót zeger 10:00 až do 16:30 a kóńc tyźenja pó dojadnanju wiźeś.

Ferijowe pórucenje:

Wótpołdnja w pśězy

Ako něga w nazymje su byli žni zakóńcone a dny krotše, su se žeńske a źowća zmakali na pśězy, aby lan pśeźěłali. Serbski muzej pśepšosyjo źiśi a starjejše na małe drogowanje do togo casa pód motom „Wótpołdnja na pśězy“, a to pětk, 30. oktobra, zeger 14:00. Zgromadnje pśisłuchajośo serbskim powěsćam, wugódajośo małe gódańka a wordujośo kreatiwne. Zastup płaśi 2 euro.

2. fachowa wuměna wó imateriel-

nem kulturnem derbstwje

Kótare nowinki dajo w modulu „Žywe kulturne derbstwo w Dolnej Łužycy“ a kak mógu se lokalne aktery lěpjej zwězaś? Wó to źo pśi 2. fachowej wuměnje wó imaterielnem kulturnem derbstwje we Łužycy. Z tym dej se dialog kołowokoło imaterielnego kulturnego derbstwa w Dolnej Łužycy dalej wjasć, nazgónjenja mógu se wuměniś, akterki a akterow se zwězaś a zgromadnje nowe perspektiwy wuwijaś. Gaž cośo tam pódla byś – stwórtk, 5. nowembra 2026, wót zeger 16:00 do 20:00, w Měsćańskem muzeju Chóśebuz –, pón pšosym pśizjawśo se pód

www.lausitz-kultur.eu/de/netzwerk/aktuelles/fachkonferenz. Wobźělenje jo dermotne, ale te městna su wobgranicowane.

Dešno/Dissen

Póbitowanja za cełu familiju

Srjodu, 28. oktobra, sćo zeger 11:00 a zeger 13:00 pšosone do dešańskego domowniskego muzeja na pśigótowanje pjaconych jabłukow. Ako prědne maju se wóni połniś. A mjaztym až te jabłuka w pjacu pjaku, maśo góźbu, muzej wuzgónjowaś a kwis wugódaś. Gaž su jabłuka gótowe, smějośo je z waniljoweju jušku jěsć. Na kuždem stwórtku w oktobrje pšosy Domowniski muzej Dešno na butrowanje. Pśecej zeger 11:00 a zeger 14:00 móžośo sami wuproběrowaś, z jadnorymi srědkami butru źěłaś. K tomu dostanjośo informacije k rolnikaŕstwje w něgajšnem casu. Kuždy pón směju swóju butru z fryšnym klěbom póžywaś. Płaśizna za to wucynijo 2,50 euro dodatnje k zastupnym pjenjezam (te wucyniju 7 euro respektiwnje 4 euro za źiśi). Sćo pšosone, se pśizjawiś pód telefoniskim numerom 035606 /256.

Hochoza/Drachhausen

Nazymski koncert

Sćo wutšobnje pśepšosone na nazymski koncert ze Serbskim folklornym ansamblom Wudwor do gósćeńca „Złośany plon“ w Hochozy. Koncert se wótmějo sobotu, 24. oktobra, zeger 18:30. Wót zeger 20:00 slědujo drastwina kjarmuša z Lausitzblech a DJ Uwe.

Rowne/Rohne

Kjarmuša na Njepilic dwórje

Njeźelu, 25. oktobra, wót zeger 15:00, sćo pśepšosone na mjaztym 23. kjarmušu na Njepilic dwórje. Žnjowny swěźeń swěśe z pyšnym programom a z dobreju jězu.

Budyšyn/Bautzen

Pupkowe źiwadło „Krabat stirbt · zemrěje · wumrějo“

W rěźe „Pupki, wino a swěccyne swětło“ Nimsko-serbskego ludowego źiwadła dožywijośo pětk, 30. oktobra, zeger 19:30 we wjelikem zalu Źiwadła na groźe muzikowy pupkowy kus „Krabat stirbt · zemrěje · wumrějo“ na górnoserbski, dolnoserbski a nimski. Gósći Johannes Kürschner a Moritz Schönbrodt z Figurowego źiwadła Osnabrück pśesajźijotej fasciněrujucu a staru maśiznu z nakijaškowymi pupkami, dudlawku (Drehleier) a žyweju elektroniskeju muziku do nacasnego konteksta. Kórtki dostanjośo na webboce theater-bautzen.de.