ŹO, GA, CO? ZAPISK TERMINOW
Nižej nalicone terminy stoje teke w śišćanej wersiji Nowego Casnika wótśišćane.
Jolic měniśo, až znajośo wažny abo zajmny termin, kótaryž serbsku zjawnosć zajmujo,
a cośo jen našym cytarjam k wěsći daś, ga pósćelśo jen nam z e-mailom abo faksom
(glej menij „Redakcija“).
sobotu, 19. septembra
Chóśebuz/Cottbus
Proba chora absolwentow
Prědna proba alumni-chora Dolnoserbskego gymnaziuma respektiwnje Serbskeje rozšyrjoneje wušeje šule se wótmějo sobotu, 19. septembra, zeger 15:00 do 17:00 w awli Dolnoserbskego gymnaziuma. Za pśigótowanje na 75-lětny šulski jubilej, dnja 4. septembra 2027, su teke dalšne terminy pśedwiźone. Glejśo na nsg-cottbus.de.
Bórkowy/Burg
Cytanje z knigłow „Wurzeln
& Wandel der Lausitz“
Pětk, 25. septembra, sćo wutšobnje pšosone do Błośańskeje biblioteki Mina Witkojc. Tam cytaju awtorki a awtory antologije „Wurzeln & Wandel der Lausitz“ wót zeger 19:00 ze swójich tekstow, kenž na wšaki part se zaběraju z temami našeje domownje – źo wó powěsćowe bytosći, wó stawizny a serbske žywjenje. Teke serbske basni móžośo słuchaś.
Na slědach Miny Witkojc
z rejowańskim projektom
Dwě rejowaŕce z dweju generacijowu se dajotej z rejowańskeju performance na slědy Miny Witkojc a to na wšakich městnach w Bórkowach. Premjera togo rejowańskego pśedstajenja buźo njeźelu, 27. septembra, zeger 15:00 a dalšne pśedstajenje zeger 17:00. Start jo pśi Błośańskem dwórnišću. Dalšny termin jo sobotu, 3. oktobra, zeger 15:00.
Źeń europskich rěcow
z koncertom
Iniciatiwa „Bórkowy zwězuju“ wutšobnje pśepšosyjo ku góźbje dnja europskich rěcow na koncert serbskego punk-fidlarja Paul Geigerzähler, ga sobotu, 26. septembra, zeger 20:45, w Brunowej billardowej kjarcmje (Waldschlösschenstr. 53) w Kupaŕskich Bórkowach. Zastup jo dermotny.
Slěpe/Schleife
Premjera knigłow
Wałtoru, 29. septembra, zeger 18:00 wótmějo se knigłowa premjera „Verschwundene Dörfer im Lausitzer Braunkohlenrevier“ w Serbskem kulturnem centrumje w Slěpem. Knigły wědomnostnika Franka Förstera, kenž se z wucynkami brunicowego górnistwa we dwójorěcnej Łužycy zaběraju, pśedstajijo dr. Robert Lorenc. Wón jo stwórty nakład wobźěłał a jen wudospołnił z wuwiśim regiona pó lěśe 2014.
Nowa dolnoserbska antologija wujšła
Pó 15 lětach jo zasej tak daloko: W serbskem nakładnistwje LND jo wujšła nowa dolnoserbska antologija, wudana wót Christiany Piniekoweje. Swóje familijowe spomnjeśa a nazgónjenja jo napisało 18 awtorkow a awtorow, naroźonych w běgu poł stolěśa mjazy 1947 a 1997. Wóni wulicuju ze swójich wšakorakich serbskich žywjenjow, kak su jich wobwliwowali starjejšej a wjele dalšnych luźi, na co se dopominaju raźi, na co njerad a na kótaru wašnju wšykno zwisujo z tym serbskim.
Za nowu antologiju su pisali: Katarzyna Fidekowa, Uwe Gutšmidt, Maksimilian Hasacki, Ingrid Hustetowa, Anna Kosacojc-Kozelowa, Stefanie Krawcojc, Fryco Libo, Werner Měškank, Justyna Michniuk, Beata Mičerlichowa, Delia Münchowa, Mila Nagorina, Ines Neumannojc, Bernd Pittkunings, Petra Richterojc, Marion Stenselowa, Pětš Šurman a Źilka alias Jill-Francis Ketlicojc.
Nowa dolnoserbska antologija „Ceje ga smy“ jo něnto na pśedań, ga we wšych znatych pśedawaŕnjach dolnoserbskich knigłow. Skazanki kupcow pśiwzejo Ludowe nakładnistwo Domowina teke pśez mejlku na abo telefoniski pód numerom 03591 / 577 288.
Premjera antologije buźo wałtoru, 13. oktobra, zeger 17:00 w Serbskem domje w Chóśebuzu.
Bibliografiske daty:
„Ceje ga smy – Familijowe spomnjeśa“. Wudawaŕka jo Christiana Piniekowa, titelna fotografija wót Petera Beckera. Brošura, 180 bokow. ISBN 978-3-7420-2869-3. Płaśizna: 19,00 €.
NOWOSĆI Z LND
„Łužyca“ – serbski magacin
19. septembera, zeger 13:25, w rbb telewiziji
(w interneśe pód www.rbb-online.de/luzyca)
Moderacija: Christian Matthée
Kak źo dalej z Dolnoserbskim gymnaziumom w Chóśebuzu? Z tym pšašanim zaběra se serbski magacin Łužyca w aktualnem wusćełanju. Hyšći zachopjeńk lěśojskich prozninow jo šula wubracha ceptarjow dla stojała pśed wjelikimi problemami. W něntejšnem šulskem lěśe stoj něnto w srjejźišću to pšašanje, kak wobšyrnje móžo se póbitowaś bilingualna wucba. Až jo šula njeglědajucy na wšykne wupominanja wuspěšna, pokazujotej wuknika šestego lětnika. Mila Heinzojc und William Buchan stej pśišłej do europskego finale „World Robot Olympiad“ w Zagrebje. Wónej pokazujotej, kak treněrujotej sam twarjone robotery za to wjelike tšojenje.
Moderator Christian Matthée jo se tenraz rozglědował na Domowniskem a drastwinem swěźenju w Bórkowach a tam mjazy łapanim kokota a swěźeńskim pśeśěgom nadejšeł pšawe serbske žywjenje. K tomu se góźi póglědnuś do Dešna na słowjańske sedlišćo „Stary lud“. Tam deje eksperimenty wugódaś, kak su w srjejźowěku we Łužycy zgótowali woblekanje.
Magacin Łužyca jo wiźeś sobotu 19. septembera zeger 13:25 w dolnoserbskej rěcy z nimskimi pódtitelami na bramborskem kanalu telewizije rbb.
