Z Bórkow/Burg. Mediclin Reha-centrum w Bórkowach pśecej hyšći pacientow pśiwzejo. Z profilak­tiskich pśicynow kśě, aby wšykne pacientki a pacienty kaž teke sobuźěłaśeŕki a sobuźěłaśerje nagubki nosyli.

„Pšosym pódpěrajśo nas, šyjśo nagubki za šćit našych sobucłowjekow“, apelěrujo amtski direktor Tobias Henšel.

Reha-centrum trjeba wokoło 1.000 takich woblicowych maskow. „Zawěsće trjebaju teke druge: Gójcowe prakse abo źiśecy dom ‚Pusteblume’, ako co w maju wótwóriś, take maski“, dodawa Katja Wendlandtowa, asistentka pśekupowaŕskego direktora.

Dej se na to źiwaś, až jano sukna ze sto procentami bałmy se wzeju, aby pałkanje z nanejmjenjej 60 stopnjami móžne było.

Reha-centrum teke pśewzejo kosty za material – až do maksimalnje 4 euro pó kusu. We twarjenju amta stajiju teke sukna k dispoziciji, ale we wobgranicowanej licbje.

Někotare linki k rozpokazowanjam šyśa takich maskow su namakaś na www.amt-burg-spreewald.de.