Z Carneje Plumpy/Schwarze Pumpe. Koncern LEAG jo tudy pśedslědnu njeźelu kazał na źeń wótwórjonych źuri, źož su wabili młoźinu, aby pla nich wuknuła pówołanje. Wjednik wótźělenja za wukubłanje Axel Ziller jo gronił, až LEAG buźo teke hyšći za 30 lět kwalificěrowane fachniki pótrjebaś, njeglědajucy na wótstupowanje wót wugla. „Chtož źinsa se wu nas wuwucujo, změjo perspektiwu za cas žywjenja w Łužycy“, jo wón nagranjał młode luźe a jich starjejše, ako su pśišli we wjelikej licbje. Na wjelich pólach móžo LEAG wuknjeńcam garantiju daś, až jich pó wuwucenju pśistajijo, k eksemplu zeleznicarjam. Něnto jo wu nich 2.500 něgajšnych wuknjeńcow pśistajonych, a to tak wóstanjo – jo Ziller lubił.

Tuchylu wuwucujo LEAG 649 acubijow. We tudskem industrijowem parku wuknjo 283 acubijow na techniskem a rucnikarskem pólu a 54 dalšnych na pśekupowarskem pólu.