Z Chóśebuza/Cottbus. Měsćańska decernentka za młoźinu, kulturu a socialne nastupnosći Maren Die­ck­mannowa, jo slědny tyźeń woglědała do wšakich měsćańskich kubłanišćow, źož se wucy serbska rěc: do žylojskeje Witaj-źiśownje „Mato Rizo“, ak jo w nosarstwje Serbskego šulskego towaristwa z.t., do zakładneje šule „Lutki“ w Žylowje, do tamnego Witaj-horta „Njewjericka“ a do Dolnoserbskego gymnaziuma. Pśewóźowała jo ju zagronita za serbske nastupnosći w měsće Ana Kosacojc-Kozelowa.

Dieckmannowa jo zjawnje pśipóznała, až wažna jo kontinuita dobreje serbskeje wucby wót źiśownje až do kóńca wušeje šule abo gymnaziuma. „Dobre rěcne znaśa, ak źiśi sebje pśiswójiju we źiśowni, njesměju se na jich dalšnej kubłańskej droze zasej zgubiś. Skerjej dej se na nje dalej twariś. K tomu dej krajna politika swóju źělbu wugbaś. Ten tuchylu zachopjony specielny spěchowański program za źiśownje jo prědna pšawa kšoceń“, citěrujo decernentku Ana Kosacojc-Kozelowa. „Ale trjebne su dalšne koncepty, aby rěcny niwow wucby teke we šulach adekwatnje pódpěrali“, jo Dieckmannowa za jeje powěsću groniła.