Z Dešna/Dissen. Tam a zas pšosy Rěcny centrum Witaj (RCW) serbske familije na swěźenje a wulěty. Slědnu sobotu su serbske źiśi a „swóje dorosćone“ byli pšosone do Dešna, to jo RCW zgromadnje z towaristwom „Gromaźe“ pśigótowało. To jo było wjasołe wótpołdnjo za wšykne. Šesć familijow jo było zastupjonych, druge su zadoru měli. Jo rědnje było, k bóśonam woglědaś, teke to wjeźenje pó cerkwi jo było źiśam pśiměrjone. Kuždy, wjeliki abo mały, jo mógł cedlik zawóstajiś, źož se jomu nejlěpjej spódoba. Faraŕka Köhlerowa, kótaraž jo se pódla Madleny Norbergoweje (RCW) kradu starała wó tu kupku, jo rozkładowała wšake wót cerkwje. W cerkwi su wše hyšći spiwali kjarliž. Nejrědnjej jo snaź było na farje. Tam na dwórje su źiśi skokali a ganjali, a dorosćone su se wulicowali a spiwali. Na kóńcu su se rědnu wjacerju zesłoźeś dali. Wšykno jo se pśigótowało w serbskej rěcy, a dorosćone su konsekwentnje powědali we tej rěcy. Źiśi su měli rědnu zgromadnosć, lěcrownož cesto skerjej nimske mjazy sobu powědaju.

To towaristwo „Gromaźe“ jo na www.gromaze.de/index.php/de/.