Wójna jo w Ukrainje, ten kraj jo wordował nadpadnjony wót Rusojskeje. W tyźeniku njejo móžno, wót aktualnego stawa pisaś. Weto se interesěrujo Nowy Casnik za tu wěc a jo pór serbskich měnjenjow nazběrał.

W Slěpem su slědny stwórtk swěśili měrowu nabóžninu z 20 kśesćijanami. Wósadna rada jo tam pšosyła, dokulaž wójna a teror, tužyca, namóc a smjerś su zasej realita w Europje. Myslili su na luźi w baltiskich republikach, w Běłorusojskej, w Rusojskej a w Ukrainje. Wěrjece maju naźeju, až zagronite se pušćaju na móc dialoga, nic na rěc bronjow. Naźeja jo, až wóla ku měrje jo wětša ako sebjepśesajźenje a móc.

Študańcki faraŕ Steffen Tušling, kenž jo aktiwny na serbskem pólu, jo pisał zjawny list. Wón měni, až Putinowa historistiska argumentacija wót Ukrainy ako něgajšnego źěła starego imperiuma njetrjefi, a pšaša: Co z togo slědujo? Jo Algeriska we tom mysle „pśecej była francojska“? Wón pišo teke wót tšacha pśijaśelow w Rumuńskej a Finskej, a se starosći wó europskich susedach.