Cerkwja jo městno za zgromadnosć. W našej cerkwi jo našo kśesćijaństwo organizěrowane. Cerkwja, to jo institucija, kótaraž dej zašćitowaś interese kśesćijanow, kśesćijańskeje wěry a tam dej se zapowědaś Bóže słowo. Chtož chójźi namšu, ten co bjatowaś z drugimi a dožywiś pśibytnosć swětego ducha. Wótere měnje, až cerkwja dej na politiskem parkeśe głosnje sobu powědaś.

Znajom teke tych, kenž gronje: Tegdy źašo wón k nim: ga dawajśo tomu kejžoroju, což kejžorowe, a Bogu, což Bogowe jo (Mt. 22, 21). Toś ta „frakcija“ měni, až cerkwja dej se staraś wó nabóžninu, a dej luźi na pokoj wóstajiś z politiku. Glědajuce na te wjele lěta wót naroźenja Krystusa ga mógu groniś: Cerkwja jo pśecej politiska była. Fararje, biskupy a druge zastupowarje našeje nabóžniny a konfesije su pśez wšykne doby sobu měšali w politice abo se wugronili k politiskim pšašanjam. Slědny pśikład jo zajźona DDR, w kótarejž ewangelska cerkwja jo była centralny pśeśiwny pol tych socialistiskich instancow. Pódpěra jo pśišła wót cerkwjow tencasneje pódwjacorneje Nimskeje.