20.02.2021, zeger 13:30 do 14:00

Gaž se powěda wó „zelenem wjerchu“ Herrmann Graf von Pückler-Muskau, pón jo to połne chwalby. Rowno něnto we februarje jo se wjele wó njom pisało: Pückler ako wugótowaŕ krajiny, spisowaśel a awtor drogowańskich reportažow a teke ako pšawy hejsak (Lebemann). Góźba jo jogo 150. narodny źeń. Njejo se pak lěbda rozjasniło jogo nastajenje k Serbam. Slědkoju su jogo serbske póddane ako tune źěłaśerje pśipomagali k tomu, daś parkoma w Mužakowje a Rogeńcu tu formu, kótaruž źinsa tak wobźiwujomy. Łužyca-moderator Christian Matthée jo kazał rěcnym partnarjam do Rogeńskego groda, ako su k tej temje slěźili.

Mimo togo dajo we februarskem wudaśu magacina filmowe rozpšawy wó serbskej wucbje w casu korona-pandemije, wó camprowanju w Janšojcach a wó starjejšynskej iniciatiwje „Gromaźe“.