Z Janšojc/Jänschwalde. Natura pokazujo, až lěśe jo se zachopiło, na pśikład pyšni źiwy mack kšomy pólow a drogow. Źiwy mack jo namakaś, źož trajda rosćo a jo swój žywjeński rytmus pśiměrił trajźe. To groni: zapšawym jo tak było, nježlic až su zachopili semjenja trajdy dokradnjej sortěrowaś. Gaž semjenja su lěpjej pśeglědane, wěcej njewusejo bur teke mak, gaž co jano trajdu měś. Wótglědajucy wót togo su pesticidy se kradu wustatkowali wót 1950ych lět sem. Pśez to su se minuli mak, kukel, módracki a zele z łatyńskim mjenim glebionis segetum. Role njejsu wěcej byli pyšne, ale monotone.

To jo se změniło, na wjele městach kwiśo zasej mak, a módracki, ako su na trajdowišćach „naturski partnaŕ“ źiwego macka. Kukel ale niźi njejo wěcej wiźeś. Pśicyna su nowe pesticidy, ako znice zela selektiwnjej, a jano su wusměrjone na „problematiske“ rostliny.