Z Šleswigsko-Holštajnskeje/Schleswig-Holstein. Feluju ceptarje friziskeje rěcy, dwa stej byłej mjaztym wukubłanej, Inga Jordtowa a Anna Puschmannowa a togodla jo wjasołosć na Instituśe za wuwijanje kwality na šulach w Šleswigsko-Holštajnskeje wjelika. „Z pomocu Anny Puschmannoweje buźo něnto friziska wucba w Breklumje zawjeźona“, jo groniła Lena Grützmacherowa, krajna fachowa póraźowaŕka z Instituta za wuwijanje kwality na šulach w Šleswigsko-Holštajnskej.

Pó lěśojskich prozninach zachopijo se pśiducy kurs, za kótaryž dajo dalšne liche městna. Mimo cełeje wjasołosći jo njedostatk ceptarjow friziskeje rěcy wjeliki a friziska wucba jo w pśiducem šulskem lěśe we wjele městnach, źož se friziska rěc pódawa, wobgrozona. Chtož ma zajm, ceptaŕ friziskeje rěcy wordowaś, dej se wobrośiś pśez frizisku radu na krajnu fachowu póraźowaŕku.