Měto Nowak z bramborskego ministaŕstwa za kulturu a Kerstin Kosakowa, zagronita za serbske nastupnosći we wokrejsu SPN, stej pśepowdałej šołśe drjenojskeje gmejny Erich Lehmannoju cesnu toflu z napismom „Nimsko-serbska gmejna“. 
Z Drjenowa/Drehnow. K tym 200 woglědarjam woklapnice pětk we kjarcmje Jagdhof su słušali teke wósebne gósći, kaž z Pódstupima Měto Nowak, referent krajnego zagronitego za nastupnosći Serbow, zagronita za serbske nastupnosći we wokrejsu SPN Kerstin Kosakowa a direktorka Picańskego amta Elvira Hölznerowa.
Šołta Erich Lehmann (67) jo wulicował wót statkow a wótglědanjow gmejnskeje rady (wósymjo raźce we njej sejźe). Na wjelich drogach su wobnowili asfalt a kšomu, su rigole napórali (aby dešćowa wóda do zemje śacała), glědadła za awta stajili, bomki sajźili a woblewali, płoty stajili a twaŕske źěła we źiśowni wuwjadli. Lětosa budu pórěźaś móst pśez Małksu, kjarchob wótwardowaś, a dalšne drogi saněrowaś.
Picański amt buźo kólasowu drogu z Majberka do Drjenowa saněrowaś – jo Hölznerowa dała k wěsći.
Hans Hokuń (Hockun; 68) jo wordował pócesćony z połnym kórbom a strusom za dłujkolětne cesnoamtske źěło ako wjednik wuzwólowanjow w Drjenowje.
*
