Stwórtk pśed dwěma tyźenjoma su w Měsćańskem domje dostojnje a cesnje spominali na 25-lětny jubilej załoženja Serbskego instituta. Do Chóśebuza na swěźeń jo pśijěła naglědna licba gósćow: źinsajšne a něgajšne sobuźěłaśerje instituta, politikarje a zastupniki partnarskich institucijow. K nim stej słušałej něgajšnej direktora instituts prof. Helmut Faska a prof. Dietrich Scholze-Šołta. Swěźeń jo wukšasniło wustupjenje Dolnoserbskego seksteta. Gósći witałej stej pśechadny direktor instituta dr. Hauke Bartels a dr. Susanne Hozyna. Bartels jo pśedstajił nowy płod źěła instituta w Chóśebuzu: korpus maminorěcneje serbskeje rěcy, kótaryž jo wótněnta pśistupny ako nowy modul portala dolnoserbski.de. Historikaŕ z instituta dr. Friedrich Pollack jo zespominał historiju Serbskego instituta, zachopjecy z jogo pśedchadneju instituciju – Institutom za serbski ludospyt, ako jo wobstojał 40 lět: wót 1951 do 1992. Dr. Anja Pohončowa jo prezentěrowała wobšyrnu jubilejnu brošuru, źož źěłabnosć instituta a płody jogo źěła su nadrobnje pśedstajone.