Pódstupim/Potsdam. Na gromadnem wobradowanju sakskeje a bramborskeje Serbskeje rady pśed dwěma tyźenjoma (Casnik jo pisał) su jeju cłonki se rozgranjali, co jo wabjenje nowych serbskich ceptarjow a wótkubłarjow tuchylu pśinjasło. Dawid Statnik jo wulicował wót pilnowanja w Sakskej. Tam su wobzamknuli ceły paket statkow, aby brachoju ceptarjow wótpomogli. Chtož studěrujo sorabistiku na ceptarske we kombinaciji z drugim fachom (to ga ceptarje wětšy źěł muse), ten móžo se lažčej za wóny drugi fach imatrikulěrowaś, teke gaž za njen płaśi numerus clausus (z togo maju teke dolnoserbske studenty swój wužytk). K tym statkam słušaju wušej togo: wósebne wabjenje za studium sorabistiki na jich Serbskem gymnaziumje; propedeutikum za interesenty, kótarež serbsku rěc njewuměju (wóni mógu se na regularny studium sorabistiki pśigótowaś a pśed jogo zachopjenim serbsku rěc intensiwnje wuknuś); su wabili za sorabistiku na binacionalnych (nimsko-českich a nimsko-pólskich) gymnaziumach a slědkoju pytali teke wukubłane ceptarje we wukraju, pśedewšym w Českej.