Z Drjejc/Drewitz. Toś ta mała serbska wjas w picańskem amśe, wósrjejź góle, jo tšochu zaspana. Gaž pak jo tam někaki wětšy swěźeń, pón jo ceła wjas na nogach. Tak jo to teke było sobotu, 18. februara, gaž su tam swěśili swój 120. zapust. K tomu jo se pśinamakało 67 pórow ze wšakich generacijow, a k tomu hyšći 22 źowćow a gólcow ze šule a źiśeceje zagrodki, to se wě, tež w serbskej swěźeńskej drastwje. Žedne zapustarki a zapustarje, ako wěcej w Drjejcach njebydle, su ten źeń pśichwatali do swójeje rodneje jsy, a to zasejwiźenje jo było wjelgin wjasołe.