Z Drjejc/Drewitz. Wesrjejź februara su w małej jsy Drjejce kradu swěśili. Na 8. februarje jo młoźina w pyšnych kostimach camprowała. Za to su – ako w kuždem lěśe – samostatnje awto twarili, aby mógali na naspomnjonem dnju wšykno derje transportěrowaś. Pśikład za lětosne awto jo była piwaŕnja Ur-Krostitzer.

Tyźeń pózdźej jo pón skóńcnje zapust był. Dogromady 17 pórikow z młoźiny jo se wobźěliło a dwa źiśecej pórika, kenž cotej w pśiducem lěśe młoźinje pśistupiś. Wótwórił jo se swěźeń wokoło połdnja w stanje, źož wjacor su reje byli. Tam jo młoźina chopiła z nagronom serbski a nimski. Pótom su se wšykne wobźělniki a wobźělnice zgromaźili a wumaršěrowali, aby na styri stacije woglědali. Ale su južo pó krotkej smuze zastali, dokulaž pśi stanje jo tak wjele gósći było, kenž su łacne byli. Pótom ale su wopšawdu prědnu staciju woglědali, źož śopłe piśa su se póbitowali a to jo było teke pśi takem zymnem wjedrje notne.