Wobraz „Marie P.“ Iris Brankačkoweje (nalěwo) jo se ako trajna wupóžyconka za Serbski muzej w Chóśebuzu wobstarał. Z wjelikeju źěkownosću jo kuratorka Christina Kliemowa (tśeśa wótpšawa) jen pśiwzeła wót Sabiny Siegoweje a Anki Nimcojc wót Załožby za serbski lud (druga a prědna wótpšawa). 
Z Města/Cottbus. Iris Brankačkowa, kótaraž jo se naroźiła 1958 w Budyšynje, słuša k nejwuznamnjejšym serbskim wuměłcowkam našogo casa, kótarež w swójom twórjenju teke Dolnu Łužycu tematizěruju. Wót 1995 wóna bydli a źěła w górnołužyskich Plusnikecach (Pließkowitz). Wóna źe powěda górnoserbski, ale póchada z dolno- a górnoserbskeje familije. Jeje maś, kótaraž jo ako rejowaŕka w Serbskem ludowem ansamblu statkowała, jo była Depšćanaŕka. „Dolna a Górna Łužyca – tej wobej mě wucynijotej ako luź. To jo, což ja som“, groni wóna sama. A to wšo se wótbłyšćujo w jeje wuměłstwje. Z togo rezultěrujo teke zajm Serbskego muzeja w Chóśebuzu za wuměłstwo Iris Brankačkoweje.
wałtora, 06.05.2025
