Z Města/Cottbus. Zajźony stwórtk jo to zasej tak daloko było: Serbski ludowy ansambl (SLA) jo pśepšosył něźi 1.600 źiśi ze źiśownjow a zakładnych šulow Dolneje Łužyce do chóśebuskeje měsćańskeje hale, aby z nimi gromaźe ptaškowu swajźbu swěśił. Dwě pśedstajeni, zeger 9:00 a 11:00, pód titlom „Pótajmny pakśik/Ab geht die Post“ su grajarje a grajaŕki SLA na jawišćo spórali. A tenraz jo ta kulisa na jawišću južo na zachopjeńku narskosć wubuźiła: Co abo chto ga za tymi zeštaplowanymi postowymi paketami a kartonami štycy? Z krotkim wokomuźenim – až do togo, až kuždy swójo městno namakał – jo se kus zachopił.