Z Bórkow/Burg. Sobotu, 18. januara, jo se wótměła 132. zapust bórkojskeje młoźiny. W wutopjonem swěźeńskem stanje jo šefowka bórkojskeje młoźiny Annemarie Schröterojc wuwitała 45 pórow a pśiglědarjow w bogatej licbje. Erik Bivour jo wuwitanje do serbskeje rěcy pśełožył. Zgromaźe ze swójeju zastupnicu Juliu Klinkojc (Klinke) jo młoźinska šefowka zestajiła pórow a pó obligatoriskem fotowem terminje jo se zapustojski śěg z pěś źiśecymi pórikami prědk wudał do jsy. Muzikaliski jo pśeśěg kapała Lutzketaler Musikanten pśewóźowała, zawěsćiła jo jen bórkojska wognjowa wobora.