Z Tšupca/Straupitz. Z wótmachom do nowego lěta! To jo było moto tšupcańskich wobydlarjow njeźelu wótpołdnja. Něźi 80 luźi jo pśišło na prědnu woklapnicu w historiji jsy do rumnosćow tšupcańskego młyna. Pśepšosyło jo towaristwo Tšupc z.t. zgromadnje z wólonymi cłonkami gmejnskeje rady. Šołta André Urspruch jo rozpšawił wó źěle a projektach w zajźonem lěśe. Tak su pó wósym lětach projektěrowanja skóńcnje zachopili prědny chódnik nowo twariś. Za to dostanjo gmejna spěchowańske pjenjeze. Až to tak tšašnje dłujko trajo, to su wejsanarje mócnje kritizěrowali. Zwjaselecy projekt jo było pómjenjenje gaski pla bóśonowego gnězda z mjenim „Zapustowa gaska“. To su zwónoźeli wejsne towaristwa z pomocu pósćiwanjow. Łoni su teke chopili, sćažki w grodowem parku do rěcha spóraś. To kśě lětosa na kuždy pad doźěłaś.