Z Janšojc/Jänschwalde. Serbski a nimski stej městnoprědkstojaŕ Hein Dabo a pśedsedaŕka Domowinskeje kupki Rosemarie Tšukowa z wjaselim wuwitałej pětk, 3. januara, wjele woglědarjow, kótarež su njeglědajucy na rowno zachopjujucy pólodk do wjelikego zala gósćeńca „K Lipje“ pśichwatali. Pó mjelcatej minuśe za w lěśe 2024 zemrětych, su wuwitali tśoch w zajźonem lěśe naroźonych Wilhelma, Oskara a Franza ze swójimi starjejšymi a su jim wobwězali mjaztym južo tradicionelne janšojske lacki. 12 nowo pśiśěgnjonych a wrośarjow jo se pód wutšobnem pśiklasku pśedstajiło. Mjazy nimi jo teke był Martin Dabow, kótaryž jo se zmužnje we wusćełanju „Bauer sucht Frau“ pśedstajił, kaž su někotare wideosekwence na wjelikej płachśe pokazali. Wón pak njejo pśi burowce Saskia wóstajił, ale jo wjasoły, zasej w Janšojcach byś. Wón jo mimo togo ze serbskim mustwom zachopjeńk junija pśi Europeaźe w Flensburgu serbsku Łužycu zastupował. Pó statistice, kótaruž jo cłonk wejsańskeje pśirady Robert Hanška (Hanschke) pśednosował, maju Janšojce k 1. januaroju 2025 618 wobydlarjow a z tym źaseś wěcej ak w samskem casu 2024.