Z Janšojc/Jänschwalde. Wjele luźi zwěžo slědny źeń oktobra ze starym keltiskim nałogom Halloween, za młogich jo to jano lichy źeń. Ewangelske kśesćijany w Nimskej spominaju 31. oktobra na Martina Luthera, ako jo swójich 95 tezow zapowědał a cerkwju reforměrował. Pśi góźbje reformaciskego dnja jo było lětosa teke zasej kazane na serbsku namšu, tenraz do Janšojc. Cerkwja jo była derje woglědana. Liturgiske nawjedowanje jo pśewzeł serbski lektor Hartmut S. Leipner, dokulaž faraŕ Tobias Jachmann jo dejał chórosći dla wótgroniś. Z teje zawiny teke njejo kazane było na bóže blido. Epistel „Ta pšawdosć pśiźo z wěry.“ (List sw. Pawoła na Romarjow, 3. Staw, 21-28) jo cytała serbska lektorka Madlena Norberg.

Ewangelijum, wurězk z „Kristusowego prjatkowanja na górje“ (Evangeliom sw. Matthejusa, 5. Staw, 1-12) jo cytał absolwent Dolnoserbskego gymnaziuma Elias Bisse.