Z Rogozna/Willmersdorf. Sobotu jo se w Rogoznje sedym rejtarjow wuběźowało wó titel žnjownego krala, a w serbskich swěźeńskich drastwach jo se wósym źowćow na tudskem žnjownem swěźenju wobźěliło. Dalšne cłonki rogozańskeje młoźiny su sobu statkowali pśi pśedawanju tykańcow, kótarež su wšake pilne maśerje wupjakli, abo teke na žnjownem wózu, źož jo teke młoźinski šef Tim Redh-feld sebje tenraz pśiźělił. Nejpjerwjej pak su se wšykne zmakali pśi sportaŕskem domje. Ten jaden abo drugi njewobźělony, kenž jo kśěł w Höffnerojc meblowem wobchoźe nakupowaś a jo na tamne parkowanišćo jěł, jo se snaź źiwał, až jo tam pśed sportnišćom kónje wuglědał – te su byli wót Jerolojc a Wjelanojc dwóra. Pśed sportaŕskim domom jo Cecilia Ludwigojc-Schewojc (Schewe) wót młoźiny hyšći tomu jadnomu abo drugemu rejtarjeju cerwjene rubiško wokoło šyje wězała. Toś te cerwjene rubiška tradicionelnje njesměju pśi rogozańskem žnjownem swěźenju felowaś.