Domowinski pśedsedaŕ Dawid Statnik jo teke Theji Kuntzojc ze Slěpego pśepódał wopismo za EUROPEADU.Teke wóni su pśišli na janšojske sportnišćo, aby wiźeli, kak „Serbske mustwo“ grajo pśeśiwo mustwoju z Lubina.

Z Janšojc/Jänschwalde. Su južo raz brazilske balokoparje w Janšojcach grali? Nejskerjej nic. Něnto pak jo se to stało, a zmóžniła jo to Domowina, nic ta janšojska, ale ta „wjelika“. Slědny tyźeń stwórtk wjacor ga su tam w „Stadionje Pušanica“ (to jo grobla, ako źěli Janšojce-wjas a Janšojce-Pipanojce) dožywili jadno wósebne graśe. „Serbske mustwo“, ako pójěźo lětosa na EUROPEADU do nimskego a dańskego Šleswiga, jo grało pśeśiwo mustwoju „Grün-Weiß Lubin“. To jo dejał byś test, kak daloko a kak mócne jo našo „Serbske mustwo“ ze pśigótami na te europske mejstaŕstwa europskich narodnych mjeńšynow w balokopanju. A do togo mustwa z Lubina, ako grajo w bramborskej lize, ga słušaju teke młoge balokoparje z drugich krajow. Naprědku su wóni z Brazilskeje, a we tom mustwje, ako jo nastupiło w Janšojcach, jo było samo pěś grajarjow wót nich.