Z Northeima. Něźi 40 zajmcow jo pśišło wjacor 13. oktobra do bergaŕskego zala města Northeim w Dolnosakskej, aby słuchało na pśednosk něgajšnego kustosa Serbskego muzeja, žurnalista a awtora Wernera Měškanka. W pśednosku pód titelom „Nimska – Twóje Serby!“ jo wón serbske stawizny nakreslił. Pśedstajił jo wón śěžke case ako teke wuznamne tšojenja a wósobiny serbsko-nimskich stawiznow a zgromadnego žywjenja Serbow a Nimcow wót srjejźowěka až do pśibytnosći. Zazněł jo pśi tom nejstaršy znaty serbski ludowy spiw „Naše gólcy z wójny jědu“, kenž jo nejskerjej nastał srjejź 12. stolěśa pó dobyśu serbskego wójwody Jakce z Kopjenika nad wójakami nimskego wójwody Albrechta Mjadwjeźa. Pśednoskoju jo se pśizamknuło wjele pšašanjow pśisłucharjow, kótarež su byli pśesłapjone, až jo wěda wó domorodnych Słowjanach w źinsajšnej Nimskej tak pśeliš mało rozšyrjona. Pśisłucharje su kśěli mjazy drugim wěźeś, cogodla žeńske njamógu se na jatšownem rejtowanju wobźěliś, a su byli pśechwatane, až to jo móžno w Dolnej Łužycy, jatšownu njeźelu w Cerkwicy.