Z Škódowa/Skadow. Škódojska młoźina jo nawězała na swóje wuspěchy łoni. Njeźelu, 13. awgusta, jo na łuce pódla Sprjewje lětosny žnjowny kral dobył.

Dogromady jo jich było wósym rejtarjow, kenž su pśeśiwo drugemu nastupili. Za jadnogo z rejtarjow jo był swěźeń malsnje skóńcony, dokulaž jo južo na zachopjeńku wót kónja padnuł a su musali rozglědniwje jogo do chórownje dowjasć.

Lětosa jo było cysty młoźinski kokot. Lětosa jo dało hyšći pódpěru wót dweju rejtarjowu z nazgónjenjami. Młoźina jo žnjowny nałog w swójej jsy zasej wóžywiła.

Młoźinski šef Christian Kamenz jo śěgnuł bilancu: „Wšykno jo derje klapowało lětosa. Smy byli teke južo pśi wiśu malsnjejše a trjebali jano dwa dnja. Dla dešćowatego dnja w pśedpólu jo teke dubowy list dosć rědnje narosło.“

Lětosny žnjowny kral bu Tim Grundke, wón jo sebje wuzwólił z 12 źowćow Luisu Kamenzojc. Drugej placěrowanej stej byłej Noah Wudi a Muriel Nabudojc. Christian Kamenz jo dojšeł na tśeśe městno, jogo kralowka jo była Alina Dubrawojc.