Chóśebuz/Cottbus. Serbski muzej jo łoni w lěśu wugótował wustajeńcu Satkula abo (st)wór(jon)a krajina (Satkula oder die Wa(h)re Landschaft) z 25 fotografijami wuměłca Karla Vouka – pśisłušnika słowjeńskeje mjeńšyny w Awstriskej. Wón jo se pśiwobrośił napśeśiwnosćam brunicoweje politiki we Łužycy a jo zwignuł ako wuměłc swój głos we tom konfliktu. To jo Spěchowańske towaristwo Serbskego muzeja pśipóznało ako wjeliku gódnosć: Wóno co te źěła kupiś a do zběrki muzeja pśiwześ. 13 toflow jo južo kupjonych, za te wuškowne zběraju něnto pjenjeze. Prědny dobrośelnik, ak jo jim něco pósćił, jo Rotary Club z Gubina. Jogo prezident Matthias Bärmann jo srjodu pśed dwěma tyźenjoma pśepowdał pśedsedarce spěchowańskego towaristwa dr. Madlenje Norbergowej check wót 500 euro.