Wóno dajo jano małko orchesterow, kapelow abo bands, kótarež we źinsajšnem, modernem casu graju na rejach. Źinsa słyšyš nejcesćej muziku „z konserwy“, rozmjej: wót computerowego sticka, CDeje abo z laptopa. Dla tog móžomy powědaś wót gluki, až w našych stronach jo band nAund južo 25 lět ducy. A ju lubuju stare a młode. Michael Matusch jo ten jaden samy muž, kótaryž jo wót załoženja až do źinsajšnego dnja pódla. Wón se wót muziki žywi a bydli w Škódowje. Wón jo našomu reporteru južo zawcasa, pśed jubilejnym koncertom, ak buźo pśiduceu sobotu, na wšykne pšašanja wótegronił...

Nowy Casnik: 20. narodny źeń wašeje formacije sćo swěśili pódla Franojc awtodomu, na jich gruntach pśi picańskem krejzu. Kak buźośo swěśiś waš 25. narodny źeń?

Michael Matusch: Ten swěźeń 2011, wót kótaregož powědaš, jo był tak rědny a raźony, až smy se myslili, až tam comy wóstaś. My buźomy stakim zasej wu Franojc w Picnju naš stan (Zelt) natwariś. We njom comy z našym publikumom pšawje a mócnje zogoliś – 25 lět ga wordujoš jano jaden raz we žywjenju.