Bórkowy/Burg. 12 študańcow, stipendiatow Nimskeje studijneje załožby, jo slědny kóńc tyźenja měło w tudejšnej młodowni (Jugendherberge) seminar, źož su se intensiwnje wopóznawali ze serbskeju tematiku. Dr. Ines Kellerowa ze Serbskego instituta z Budyšyna jo jim źaržała referat wó ludowych drastwach, historikaŕ dr. Pětš Šurman ze Serbskego instituta w Chóśebuzu jo wulicował wó historiji Serbow. Wó serbskem politiskem źěle jo powědała Angela Šurmanowa, cłonk Serbskeje rady. Referat wó Witaj-projektu a rewitalizaciji serbskeje rěcy jo źaržał wjednik Rěcnego centruma Witaj w Chóśebuzu dr. Viktor Zakar. Šefredaktor Nowego Casnika Gregor Wieczorek jo wulicował wót wósebnosćow serbskego žurnalizma. Pśizamknuło jo se rozgrono.

Študańce su woglědali wušej togo do Domowniskeje śpy w Bórkowach a měli wjeźenje pśez wjas, naslědku su jěli z kajakom do Błotow ze sobuźěłaśerjom biosferowego rezerwata.