Z Wjerbna/Werben. Z muziku, z wjasełosću a kradu narske su luźe na wjacorje Bórkojskego swěźenja domownje a ludowych drastwow pśišli do gósćeńca „Zum Stern“. Jich jo było jadnab 80, zwětšego wejsne chronisty, regionalne slěźarje, pśijaśele domownje, basnikarje, wuměłce a fotografy. Tam ga su prezentěrowali domownisku pratyju „Stog 2023“ 25. awgusta. To cełe jo cesćenje Wjerbna. Ta wjas jo wordowała pśed 675 lětami prědny raz naspomnjona we urkunźe. Rolf Radochla, pśedsedaŕ Spěchowańskego towaristwa za domownisku historiju „Stog“, jo pó tradiciji pśepódał Tobiasoju Hentšeloju to prědne wudaśe nowego „Stoga“. Hentšel jo direktor Bórkojskego amta. Wón jo gronił: „Jaden dej swóju domownju kradu lubowaś, aby take spódobne tšojenja napisaś mógał za pśichodne generacije“. Pócesćili su na tom wjacorje Radochlic Edeltraud a Rolfa za swójo dłujkolětne zwěrne źěło ze Stogom. Doněnta jo to było 19 wudaśow. Dostałej stej prezentny kórbik, a publikum jo aplawděrował.