Z Chóśebuza/Cottbus. 19. maja su wujšli dalšne knigły Spěchowańskego towaristwa za serbsku rěc w cerkwi z.t (STSRC), kótarež maju byś pśinosk towaristwa za Łužyski cerkwiny źeń, kenž se wótmějo lětosa wót 24. do 26. junija 2022 w Zgórjelcu. Edicija wopśimjejo w šesć rěcach Milana Hrabalowu basnisku twóŕbu wó kśicowem puśu Jezusa a to dolnoserbski (Alfred Měškank), česki original (Milan Hrabal), górnoserbski (Róža Domašcyna), nimski (Róža Domašcyna), jenźelski (Milan Hrabal jun. a Gerald Stone) a pólski (Justyna Michniuk). Wobalka pokažo hołtarjowy wobraz w Serbskej cerkwi w Chóśebuzu z dolnoserbskim napismom nad kśicowanym „Ta kšej Jesu Christusa, togo syna Božego, hucysćijo nas wot šyknogo grěcha“, jadnotliwe wersije basnje su wót se źělone pśez wšake dolnołužyske, carno-běłe litografije ze 19. stolěśa. Pśedsłowo jo napisał pśedsedaŕ spěchowańskego towaristwa, Hartmut S. Leipner. Knigły wopśimjeju 100 bokow. Nakład je 400. Prezentacija knigłow buźo na serbskej namšy swětkowne pónjeźele w Turjeju, pón na Łužyskem cerkwinem dnju w Zgórjelcu.