Z Budyšyna/Bautzen. Zjawne pósejźenja Zwězkowego pśedsedaŕstwa Domowiny dejali dalej teke ako livestream póbitowaś, njewótwisnje wót wuwiśa korona-pandemije. To pórucyju gremije jogo prezidija, kenž jo nastupnosć na swójom prědnem wobradowanju pó głownej wólbnej zgromaźinje w Budyšynje a online rozpowědał. „Rezonanca z až do 170 pśiglědowarjami pokazujo na wjeliki zjawny zajm“, informěrujo medijowy powědaŕ Domowiny Marcel Brauman w medijowej powěsći. Ako nowego cłonka nejwušego źěłowego gremija kšywowego zwězka mjazy wobradowanjami zwězkowego pśedsedaŕstwa su witali wałtoru tyźeń zastupnego pśedsedarja za Dolnu Łužycu Hartmuta Leipnera. Dalej pśisłušatej prezidijoju pśedsedaŕ a górnołužyski zastupny pśedsedaŕ Domowiny Dawid Statnik a Marko Hančik. „Dalšneju cłonkowu wuzwólijo pśedsedaŕstwo na naraźenju pśedsedarja“, stoj we tej powěsći.