Z Šejnejdy/Schönhohe. Źo ga móžomy se zmakaś, źo móžomy gromaźe swěśiś? To se pšašaju we młogich serbskich jsach w Dolnej Łužycy, źož su kjarcmy bóžko zacynjone. Wšake jsy su pytali a namakali druge móžnosći za to. We Strjažowje se něnto zmakaju w starej šuli a w Popojcach su stary konsum pśetwarili ako gmejnski dom.

Teke w Šejnejźe pla Turjeja su pytali južo dłujko take zmakanišćo za tych něntejšnych něźi 70 wobydlari. Wót nich pak jo jano hyšći kuždy pěty roźony we tej wjasce srjejź góle, wšykne druge su pśiśěgnjone.

Jo to było w lěśe 2017, ako su cytali w „cajtunze“ (LR), až su w jadnej małej jsy blisko Gołkojc wobydlarje załožyli take zmakanišćo. To su se pón teke woglědali, a z togo casu su se kšuśe prědk wezeli, až kśě něco pódobnego napóraś.