Ze Zaspow/Saspow. Slědnu sobotu jo wognjowa wobora w Zaspach wóswěśiła swójo 125-lětne wobstaśe. Ta wjaska pśisłuša Chóśebuzoju a ma jadnab 700 wobydlari.
Pśi góźbje jubileja su zaspicke wognjowe woborniki wugótowali z wobydlarjami a wognjowymi woborami z Chmjelowa, Žylowka, Šlichowa, Škódowa, Strobic, Dešanka, Depska, Kórjenja a z Města samego zgromadny wejsny swěźeń.
W swěźeńskem pśeśěgu z historiskimi a nacasnymi awtami wognjoweje wobory pó Zaspach wobźělichu se teke naměstne kulturne towaristwa a firmy. Něźi dwaźasća źiśi a žeńskich jo se w pśeśěgu wobźěliło w serbskich swěźeńskich a źěłowych drastwach.
Pótom buchu wózydła wognjowych wobornikow pśi sportnišću zestajone, a kuždy zajmc jo mógał je sebje teke raz zbliska woglědaś.
Pisany kulturny program jo był pśigótowany. Dujarje pak su musali wochylu pśestaś tšubiś, pśeto na sportnišću pśipódla su muske grali kopańcu. Wacej by koparje snaź pśi głosnem tšubjenju šwicałku sudnika njesłyšali. Ale za zaspickich jo se wupłaśiło: Motor Zaspy jo graśe pśeśiwo SV Adler z Klinki dobydnuł z 8:1.