Chor Dolnoserbskego gymnaziuma dostanjo nowu drastwu za wustupy wót designerki Sary Gwiszcz. Za źowća jo zešyła módrośišćane a žołte kóšule. Gólcy dostanu módrośišćane a zelene bruslace.
K dopomnjeśu: Sarah jo młoda designerka mody z Lubnjowa. Wóna jo wótzamknuła 2012 swój bachelor of arts na akademiji moda&design Barliń, a tegdy jo se wóna wobźěliła na projekśe „sorbisch modern“, pódpěranem wót Europskeje unije. Wót lěta 2014 jo Sarah samostatna designerka a jo załožyła firmu „Sarah Gwiszcz – modowy design“. Hyšći we tom samem lěśe jo załožyła swój modowy label „Wurlawy“. Južo łoni jo měła z nim swój debit na Fashion Week „Potsdam Now“.
Gaž sćo se južo pšašali, cogodla wóna jo wzeła mě „Wurlawy“, how jo wótegrono: Sarah jo se zaběrała z powěsćowymi figurami a jo namakała wurlawy. Wóni su pśezpołdnicy pódobne. Gaž źowćo pśedłujko jo na pśězy, dostanjo nadawk wót wurlawy. Ten pitśku tšašecy charakter jo zajmny a pó měnjenju Sary góźi se derje ako motiw za drastwu.