Z Dešna/Dissen. 22. awgusta jo serbska wósada Dolneje Łužyce dožywiła wjerašk w serbskem cerkwinem žywjenju a we swójej historiji. Na tom dnju jo se dešańska faraŕka Katharina Köhlerowa pówołała ako koordiněrujuca faraŕka za serbske wósadne źěło w cełej Łužycy. Zapokazańska namša jo se swěśiła we rědnje wupyšnjonej dešańskej cerkwi a jo se źaržała wót wušeje promštowki EKBO Tereze Rinekeroweje. Pśichwatali su nimske a serbske zastupniki cerkwinych institucijow a gremijow, ako Clemens Bethge z barlinskego konsistorstwa, Matthias Scheufele wót Centruma za dialog a pśeměnjenje w Kórjenju, Měrćin Wirth we zastupnistwje serbskego superintendenta a Manfred Hermaš wót serbskeje pśirady.