Domowina w Dolnej Łužycy jo 75 lět stara. Sam som 46 lět jeje cłonk, mjaztym južo bejnych lět mimo kupki teke w towaristwach, kenž našomu kšywowemu zwězkoju pśisłušaju. Swěśimy wušej togo dalšny jubileum, 100-lětne wobstaśe župow ako regionalne cełki. Jo sama wěrnosć, až njejo se mógała pśedwiźona župa Dolna Łužyca z mjenim Hendricha Jordana w lěśe 1921 załožyś, dokulaž jo tegdy baza za to felowała. Źinsa trjebnu bazu mamy, župa Dolna Łužyca jo pó licbach samo nejžwětša w Serbach. Cogodla pak njama swójske mě ako druge župy? Naraźenjow by měli dosć a nadosć, snaź Minu Witkojc. To by teke prědna žeńska była w rěźe Jakuba Lorenca-Zalěskego (Běła Wóda/Niska), Jana Arnošta Smolerja (Budyšyn), Michała Hórnika (Kamjeńc) a Handrija Zejlerja (Wórjejce).