Lube źiśi,

móžośo wariś? Smějośo něco cyniś w kuchni? Młoge starše źiśi kśě wariś. Wariś wuknuś: To móžośo doma. Wariś wuknuś: To su źiśi teke mógali w Lubnjowje. Góźba jo była slědna wałtora. Rozmjej: Šula za dolnoserbsku rěc a kulturu jo pšosyła na „Junior-Kochen“. Městno jo było kulturny centrum „Gleis 3“. Źiśi a młodostne su wšake zgónili a wuknuli. Ceptaŕka jo była Uta Henšelowa. Wóna jo wjednica Šule za dolnoserbsku rěc a kultury. Naš awtor Bernd Marx jo tam był. Cytaj, cytajtej a cytajśo sami!

„Nejpjerwjej su źowća a gólcy wuknuli serbske wokable. Uta Henšelowa jo groniła ‚Źinsa comy znatu zupu z kopśiwami wariś. Ta zupa jo teke znata ako ‚špinat chudych luźi’. Do togo comy spóznawaś serbske mjenja pśicynkow.‘ Wóna jo nalicyła pśicynki na nimski a na serbski. To su byli: Muka, mloko, klěb a cukor. Źiśi su to wóspjetowali. Wóspjetowali su teke wokable ‚cybula‘, ‚sol‘, ‚butra‘, ‚wóda‘ a dalšne pśicynki, kenž trjebaš za taku zupu.