Z Barlinja/Berlin. Chtož lubujo dobru a wósebnu telewiziju, ten snaź casy zašaltujo program „arte“. Jo to nimsko-francojski kulturny sćelak, ako bu w lěśe 1991 załožony, aby w francojskej a nimskej rěcy głownje pśedstajił to cełe pisane žywjenje we Europje a historiju togo kontinenta. A chtož se za program „arte“ cesćej rozsuźijo, ten wě, až su jogo reportaže, dokumentacije a dalšne pśinoski wjelgin interesantne a wěrne. Pśecej pytaju za nowymi idejami a temami. Južo pśed styri lětami su wulagnuli taku ideju, we wšakich filmach se z tym zaběraś, kak jo žywjenje we jsach, z cymž maju se wejsanarje we Europje cesto běźiś. Tak jo nastał projekt, pód motom „Village x“ (Wjas x) pśedstajiś w jadnej dlejšej seriji jsy a wjaski a žywjenje, starosći a wjasela jich młodšych a staršych wobydlari.