Gjarde rejtarje a rědne maruše mósćańskeje młoźinje su slědny kóńc tyźenja swěśili žnjowny swěźeń. Rejtarje wótlěwa su: Jeremy Krüger, Lenny Hobracht, Lorenz Pawlik, Nick Nowka a Jerome Stolz. Kralowki z struskami su (wótlěwa): Luise Binderojc, Elena Weberojc a Rošyc Gina (Rocha). Foto: Christine Adamowa 
Z Mósta/Heinersbrück. Slědnu sobotu jo se tradicionalne serbski žnjowny swěźeń młoźiny na sportnišću w Mósće swěśił. Za to su źowća młoźiny tśi dny wrota, wěnce za krale a teke žnjownu kronu z dubjanymi listami wili. Žnjowny wóz jo był rědnje pyšnjony a měł teke kšasnu žnjownu kronu. Pśigótowanja su byli w połnem źěle, tak až wšykne gósći su dožywili rědny źeń.
Wšykne pěknje frizěrowane źowća młoźiny w serbskich swěźeńskich drastwach a rejtarje z kónjami su se zmakali z dujaŕskeju kapału „nAund“ a su śěgali z dobreju myslu pśez wjas na sportnišćo. Tam jo se zachopiło tšojenje zeger dweju, ga to pěśo rejtarje su pśi rejtowanju pśez wrota małe prezenty wułojli a pózdźej zawěsće jo był kokot na rěźe.
