Na Górach/Guhrow. Normalnje by Górjańske łoni swój źasete zabijanje kokota swěśili. Korony dla pak njejo to móžno było. Lětosa su wóni mógali ten wjerašk nachwataś. To su wóni cynili slědnu sobotu, pótakem we awgusće – normalnje maju how w septembrje swój žnjowny swěźeń ze zabijanim kokota. Lětosne hynakše rědowanje ma cyniś z tym, až su swój žnjowny swěźeń tencas zwězali z gmejnskim swěźenjom ku góźbje „150 lět měrowy dub na Górach“. Pśed 150 lětami ga su sajźali ten dub w spomnjeśu na padnjonych wójakow. „Ale wažna mysl za tym gmejnskim swěźenjom jo pśedewšym, se wuźěkowaś wšyknym, kenž su pśed dwěma lětoma, pśi swěźenju 550lětnego jubileja Gór, něco pósćili abo na drugi part pomagali“, rozjasnijo Lysann Rybakowa, cłonk pśedsedaŕstwa górjańskeje Domowinskeje kupki. Wóna jo była wušej togo ta, ako jo měła pśed źaseś (pópšawem pśed jadnasćo) lětami tu ideju, na Górach zabijanje kokota zawjasć. Na to jo se pśi góźbje togo jubileja teke spomnjeło, to se wě.