Z Lubina/Lübben. Kóńc maja togo lěta su wótwórili w „Horicontalnej galeriji“ lubinskeje krajneje raźcownje wustajeńcu z něźi dwaźasća fotami, kenž na wósebny part temu „tradicija“ pśedstajiju. Źo wó serbske drastwy – pó starej tradiciji rowno tak ako pó nowo interpretěrowanej tradiciji. Te nowše pśirězki a formy su wót lubnjojskeje młodeje designerki Sarah Gwiszczojc. Wóna teke njejo felowała pśi góźbje finisaže teje wustajeńce slědny stwórtk. Pśišła jo ze swójeju sobuźěłaśeŕku a modelom (wšak njejo na tych fotach ako model wiźeś) Josephine Bürgerojc. Wóna jo zastupowała swójogo pśijaśela, fotografa Stefana Otta, kenž bóžko njejo mógał na ten termin pśiś. Sarah Gwiszczojc źěła južo wót lěta 2016 z nim gromadu.
Dalšny gósć jo była Marit Dietrichowa, jadnaŕka towaristwa „Turizm, kultura, měsćański marketing Lubin“ (TKS Lubin), ako jo ideju za ten fotowy projekt zgromaźe ze Sarah Gwiszczojc wuwiła a jen ze swójim towaristwom pśewjadła. Pśez zarědowanje jo wjadł – tak ako tek južo pśi wernisažu – kulturny decernent wokrejsa Dubja-Błota Stefan Wichary.