Z Baršća/Forst. Gaž maju sezonu we baršćańskem Rožowem parku, wót kóńca maja do kóńca septembra, wugótuju normalnje raz wob mjasec tak gronjony „Rosengartensonntag“ z wósebnym programom. Slědny kóńc tyźenja w juniju swěśe how we wjelikem ramiku swóje „Rosengartenfesttage“ – to pak jo lětosa pandemije dla wupadnuło. Aby weto mógli w casu pandemije swójim gósćam wěcej bitowaś, wugótujo město Baršć lětosa samo kuždy drugi kóńc tyźenja „Njeźelu Rožowego parka“. Program pśecej wobstoj z muziki, reje a pógibowańskego pśedstajenja („walk-act“), a za kuždu taku njeźelu jo to něco drugego a nowego.