Do Błotow! Ale źo? Do Bórkow, do Raduša, do Tšupca, do Noweje Niwy, do Lubnjowa, do Lubina, do Stareje Niwy, do Bobolc, na Lědy abo do Lipjego? Tam wšuźi som južo cesćej cołnował, na tamnych tšugach abo na Sprjewi samej.

Jaden rožk w Błotach pak mě hyšći felujo. Słopišća (Schlepzig) w Dolnych Błotach to jo. Póbył tam južo cesćej som, wšake som se tam woglědał – mały wejsny muzej, znaty bliski lěs z bukami a teke tamnu krajinu z bagnom. To cołnowanje pak njejo mě dotychměst tak pšawje wabiło. Ale něnto jo był nejwušy cas za to...