Wrocław/Breslau. Głowne město Šlazyńskeje Wrocław jo lětosa wumjenjone ako kulturne głowne město Europy. Tam se pśewjeźo wót źinsajšnego dnja (stwórtk) až do soboty lětosny kongres Federalistiskeje unije europskich narodnych kupkow (FUEN).
Z Budyšyna jo k nam doleśeła powěsć, až Domowina buźo tam mócnje zastupjona (wóna jo cłonk FUEN wót lěta 1990). Serbskej delegaciji pśisłušaju pśedsedaŕ a jadnaŕ Domowiny Dawid Statnik a Bjarnat Cyž, zastupna pśedsedarka Domowiny a wjednica mjeńšynowego sekretariata Judith Wałdźic, pśedsedarka młoźinskego towaristwa Pawk Franciska Grajkarekojc, a z Dolneje Łužyce wjednica janšojskeje młoźiny Silvia Oehlertojc a zastupny jadnaŕ Domowiny Marcus Końcaŕ.
Na kongresu pśewjeźo se wu–zwólowanje wjednistwa FUEN. Zwězkowe pśedsedarstwo Domowiny jo naspjet nominěrowało Bjarnata Cyža ako viceprezidenta FUEN a Dawida Statnika ako cłonka europskego dialogowego foruma FUEN – wónej wobej stej tu funkciju južo we doněntejšej legislaturnej perioźe wugbałej.