Z Dešna/Dissen. Pópšawem by dejał měś Sven Balak (Ballack) z Janšojc, roźony w susednych Drjejcach, měś nanejmjenjej tśi abo styri ruki, aby wšykno to pśecej naźěłał, což ma prědk. W picańskej firmje źěła 47lětny ako mechanikaŕ za załožki (Anlagenmechaniker), a gromaźe ze swójim nanom matej hyšći „tak pśipódla“ rolnikaŕstwo z něźi 180 hektarami pólow a łukow w drjejcańskich a janšojskich stronach a k tomu wokoło 80 gowjedow.
A wušej togo musy pśecej hyšći ten cas namakaś za swój wósebny lubušk – to groni za balokopanje. „Ja som górjej rosł z balokopanim. Som grał we wšakich mustwach doma w Drjejcach a w Janšojcach. Dlejšy cas som pla Energije w Chóśebuzu na wšaki part pomagał pśi wukubłanju małych a młodych balokoparjow, to groni juniorow“, wón wulicujo. 18 lět dłujko jo był ako sudnik ducy na sportnišćach w Dolnej Łužycy. A něnto južo žedne lěta źěła ako głowny trenaŕ za mustwo „Eintracht“ w Picnju, ako grajo w bramborskej krajnej klasy, a to z dobrym wuspěchom.