Z Dešna/Dissen. Kak móžomy zasej gromadu pśiś? Kak by mógali se naše balokoparje a naše cłonki zasej zmakaś? Wó tom běchu cłonki pśedsedaŕstwa towaristwa „Serbske koparje/Wendische Auswahl“ gromaźe z drugimi cłonkami w maju a juniju wobradowali a pśemyslowali. Korony dla ga njejsu cłonki towaristwa se směli wjele mjasecow dłujko zmakaś. Teke we swójich domacnych mustwach – w Žylowje, Dešnje, Picnju, Drjenowje a hynźi – njejsu mógali balo kopaś. A teke Europeada jo južo druge lěto zasobu wupadnuła. To wšykno jo wšym wjelgin bóleło. Pśedsedaŕstwo jo se togodla rozsuźiło, až ma se pśiducy lěśojski cas derje za to wužywaś, aby balokopaŕki a balokoparje a, to se wě, teke dalšne cłonki towaristwa, ako bu pśed styri lětami w Dešnje załožone, zasej zmakali a aby se zasej zachopiło zaměrne źěło w towaristwje. Cłonki deje pytnuś a wiźeś, až njejsu zabyte!