Lasć - Die List - jo lětosa tema nocy powěsćow pód Bismarckowym tormom w Bórkowach. Zarědowaŕ jo zasej bórkojska gmejna. Wóna pak ma wjele pódpěrowarjow we našom regionje, wósebnje za ten pśedprogram. Krajny raźc Harald Altekrüger jo wjelgin wuchwalił, až Noc powěsćow zasej dajo. „Ten event dej byś we našom regionje“, jo gronił.

Drugi raz jo Serbski ludowy ansambel (SLA) wuměłski wugótowaŕ togo spektakla, a jadnanje źo direktnje dalej wót slědnego lěta.

Lutka Jolka a Jorko zasej skocyjotej do zachadnosći. Slědkoju njejstej kronu serbskego krala, kótaruž stej w góli zgubiłej, teke w pśibytnosći zasej namakałej. Lěbda, až stej do zachadnosći dojšłej, se južo zasej wójujo wó Limasowy grod. Tenraz co serbski kral Pśibisław swój grod wót carnych ryśarjow zasej slědk dobyś. Jomu pomaga pśi tom jogo śeśko Bolko.