Z Města/Cottbus. W Serbskem muzeju su zachadny pětk wótwórili wustajeńcu „Wejsne wobraze – hynacej žywe byś/Dorfbilder – anders leben“. W njej jo 67 carno-běłych fotografijow Thomasa Kläbera gromaźonych, ako mały wurězk jogo wjelikeje twóŕby. Wóna jo prědna swójska wustajeńca wuměłca a jo až do 19. septembra k wiźenjeju.

Christina Kliemowa, kuratorka Serbskego muzeja, a Carmen Schliebowa, kustodowka Bramborskego krajnego muzeja za moderne wuměłstwo (BLMK) w Měsće, stej pśedstajiłej žywjenje Thomasa Kläbera. Jadnab 45 gósći jo jima pśisłuchało na dwórcyku muzeja a teke wuměłc Kläber jo był pśipódla. Mytowany fotograf jo mjazy drugim znaty za to, až wótmólujo kužde lěto titelowy wobraz za Serbsku Pratyju. W Ludowem nakładnistwje Domowina su łoni teke wujšli knigły „Land.Leben – Na jsy“, kótarež teke pokažu jogo fotografije ze zachadnych lětźasetkow. Wšake wobraze z tych knigłow su něnto teke wustajone w Serbskem muzeju.